လူပျိုဖော် အပျိုဖော်ဝင်ခြင်းသည်
အသက် ၉နှစ်မှ ၁၆နှစ်အတွင်း လူတိုင်းဖြတ်သန်းရမည့် ကာလအပိုင်းအခြားဖြစ်ပါသည်။ ကလေးဘဝမှ လူကြီးဘဝ ပြောင်းလဲသော ထိုကာလတွင် ရုပ်ပိုင်းဆိုင်ရာ၊ စိတ်ပိုင်းဆိုင်ရာ ကိစ္စများလျင်မြန်စွာ ဖြစ်ပေါ် လာနေပါသည်။ ဆယ်ကျော်သက် တစ်ဦးနှင့် တစ်ဦးမှာ ဖွံ့ဖြိုးမှုနှုန်းမှာ မတူညီကြပါ။
(၁) ရုပ်ပိုင်းဆိုင်ရာပြောင်းလဲမှုများ
ယောကျ်ား လေးများတွင် အရေပြားပေါ်တွင် အဆီဓာတ် ပိုမိုများပြားလာခြင်း၊ ချွေးဂလင်းများ အလုပ်ပိုလုပ်ခြင်း၊ အရပ်ရှည်လာခြင်း၊ယောကျာ်း ပုံပေါ်လာခြင်း ဝက်ခြံထွက်လာခြင်း၊ အမွေးအမှင်များထွက်လာခြင်းနှင့်
အသံသြလာခြင်းတို့ဖြစ်သည်။
မိန်းကလေးများတွင် အရေပြားပေါ်တွင် အဆီဓာတ် ပိုမိုများပြားလာခြင်း၊ချွေးဂလင်းများ အလုပ်ပိုလုပ်ခြင်း၊ အရပ်ရှည်လာခြင်း၊မိန်းကလေး ပုံပေါ်လာခြင်း၊ ဝက်ခြံထွက်လာခြင်းနှင့် အမွေးအမှင်များထွက်လာခြင်း တို့ဖြစ်သည်။
(၂) စိတ်ပိုင်းဆိုင်ရာ ပြောင်းလဲမှုများ
ကျားမကွဲပြားခြင်းကို စတင်သတိထားမိလာပြီး ဆန့်ကျင်ဘက်လိင်ကို သတိထားမိလာသည်။
တစ်ကိုယ်တော်ကာမစိတ်ဖြေမှုကို စတင်ပြုလုပ်လာနိုင်သည်။ စူးစမ်းလိုစိတ် စွန့်စားလိုစိတ်များဖြစ်ပေါ်လာနိုင်သည်။ စိတ်စေစားရာနောက်ကို လိုက်ပြီးလုပ်တတ်သည်။ စိတ်အတက်အကျ အပြောင်းအလဲ မြန်တတ်ပါသည်။ ခန္ဓာကိုယ်ဖွံ့ဖြိုးမှုနှင့် အလှအပကို အခြားရွယ်တူများနှင့်နှိုင်းယှဥ်ကာ အလွန်စိတ်ဝင်စားလာသည်။
မိသားစုနှင့်နေလိုစိတ်လျော့ပါးလာပြီး ကိုယ်ပိုင်လွတ်လပ်ခွင့်ကို ပို၍ လိုလားလာကြသည်။ မိသားစုနှင့်စာလျင် သူငယ်ချင်းများကို ပိုမို ခင်တွယ်လာတတ်သည်။ သူငယ်ချင်းများ လုပ်သည့်အတိုင်းလိုက်လုပ်တတ်လာသည်။
မိမိခြေထောက်ပေါ်မိမိ ရပ်တည်ချင်လာသည်။ မိမိလုပ်သော လုပ်ရပ်များအပေါ် အမှားအမှန် ခွဲခြားနိုင်လာသည်။
ဘဝအတွက် ကိုယ်ပိုင်ရည်မှန်းချက် ရည်ရွယ်ချက်များ ချမှတ်တတ်လာသည်။
ကိုယ့်ကိုယ်ကို လူကြီး ဖြစ်ပြီ အထင်နှင့် ကိုယ်ပိုင်ဆုံးဖြတ်ချက်များနှင့်လုပ်ဆောင်လိုစိတ်များ ရှိလာသည်။
စည်းမျဥ်းစည်းကမ်းများကို အရွဲ့တိုက်ပြီး ဆန့်ကျင်ဘက်လုပ်တတ်လာသည်။
အကဲဆတ်သော မြီးကောင်ပေါက်အရွယ် ကျန်းမာရေး ကို မိဘများ၊ ဆရာ ဆရာမများ၊ ရပ်ရွာ လူမှုအဖွဲ့အစည်းများအနေဖြင့် နားလည် သဘောပေါက်ပြီး ဆယ်ကျော်သက်လူငယ်များကို အားပေးကူညီ စောင့်ရှောက်ပေးသင့်ပါသည်။
ဆယ်ကျော်သက်အရွယ် လူငယ်များအနေဖြင့် အပျိုဖော် လူပျိုဖော်ဝင်ခြင်းကို ရှက်ရွံ့နေစရာ မလိုပေ။
ပုံမှန်ပြောင်းလဲမှု မဟုတ်သော အခြေအနေများတွင် ဆရာဝန်နှင့် တိုင်ပင်ဆွေးနွေးနိုင်ပါသည်။
ဆယ်ကျော်သက်အရွယ် လူငယ်များကျန်းမာရေးအသိပညာ မြင့်မားစေရန် ရည်ရွယ်ပါသည်။
#adolescenthealth
Ref: standardised health message Myanmar
Comments
Post a Comment